Baewlu ‑ɛ mua 'e Kea ‑nmɔa 'diwɔn ‑pee
86
Dafi 'a baewlu.
Ɛ ‑te' doun", ɛ kpʋn 'ma baewlu‑ Tʋ "bo,
dɛ ‑nʋɛ ɛ 'ɩn se dɛwɔn nɩ‑.
2 Ɛ fuo 'mii dɛ ‑nʋɛ ɛ, 'ɩn ke ɛ "sii ɛɛ "i,
'de ɛmɛ nɩɛ 'ma Kea ‑o.
'Ɩn nɩɛ ɛɛ' dbonʋɩ ‑ɔ ‑teɛ' ‑kwlɩ" ɛ, ɛ 'pʋʋ 'ʋn.
3 'Oo Tʋ "bo ɛ nʋ 'ʋn 'saa 'ʋn "jrii,
'ma wee ɛ o 'de ‑sɔn' 'oo ‑sɔn' 'di.
4 Ɛ nʋɛ ‑wɛe ɛɛ' dbo nʋɩ 'jee 'mʋa‑ 'ʋn' nɩ,
dɛ ‑nʋɛ, Tʋ "bo, ɛmɛ 'ma nyiɔ jɔ ‑wee'‑ "bie o.
5 Kɩɩn, ɛ nmɔ 'diwɔn Tʋ "bo,
ɛ ‑teɛ nyʋ 'a ‑kwɔ "kpei wlʋa 'a kein" ke,
ɛɛ' nyʋ 'a ‑tɩ' kmaa' poɛ "jri "kpae
'de nyʋ ‑ʋʋa ‑gbɛɛ'‑ "juɛi ‑pee.
6 Tʋ "bo! ‑Ɩn po 'ma baewlu doun" o,
'ma baewlu sie ‑ʋn doun" 'di.
7 ‑Bo 'ɩn nɩ 'e 'kle 'di ɛ, ɛmɛ 'ma po ‑tooi",
dɛ ‑nʋɛ ɛɛ muɛ 'ma baewlu kpʋan'.
8 'De ‑kɩɩ'‑ ‑wee'‑ "klu ɛ, Tʋ "bo,
nyɔ jrɔ' ke ɛ se "i ‑kooɔ'‑
nyɔ jrɔɔ' nʋʋdɩ ke dɩ ɛmɛ nʋa se "i ‑koɔɔ'‑.
9 'blʋa "kpei nyʋ ‑wee'‑ ɛ nʋa,
ʋʋ ‑wee'‑ a muɛ jia' ʋʋ 'je 'kɔi ‑klu' po 'bo ɛ "juɛi,
'oo Tʋ "bo, ‑wɛe ʋʋ 'jeɛ 'nynɩ ‑sa.
10 Dɛ ‑nʋɛ ɛ, ɛ "bɛi, ‑wɛe ɛ nʋ jrii' klae" klae".
Ɛmɛ due' koun ‑gbai' ɛmɛ ‑nɩ Kea.
11 'Oo Tʋ "bo, ɛ tɔɔ 'ʋn ɛɛ' ‑jeblʋ 'ɩn 'jea kpa,
‑wɛe 'ɩn 'je na 'de ɛɛ' "isrɛa 'ʋn.
Ɛ nʋɛ ‑wɛe 'ma pɛe ‑wee'‑ "klein 'je ɛɛ ni' ‑te'.
12 'Ma muɛ 'kpɩ 'e pooa' 'de 'ma pɛe ‑wee'‑ "klein 'ʋn,
Tʋ "bo, 'ma Kea, ‑wɛe 'ɩn 'jeɛ 'nynɩ ‑sa mamaʋ 'sʋ.
13 Dɛ ‑nʋɛ, ɛɛ' 'diwɔnmɔa' "bɛi 'de 'ʋn ‑pee,
‑wɛe ‑ma ‑seie 'ma ‑suu 'de 'mɛ bie "wɛin.
14 'Oo Kea, ‑cɛi" 'bɛʋn a ‑fɔn' 'ʋn o,
nyʋ ‑nɩa ‑flaan" ‑flaan a ‑pɔn 'ma 'kmʋ ‑sa ‑kwɔ i;
‑ma pleea' se ʋʋa' tɔ' 'ʋn nɩ‑.
15 'De ‑mɔ, Tʋ "bo, ‑ma jeɛ nyʋ 'a wɛe‑,
‑ma nʋɛ nyʋ 'saaʋn "jrii, ‑ma 'cɛn 'kpaa nɩɛ 'kle.
Ɩn ‑kma nyiɔɔ ‑tɩ' ‑wɛe ‑maa' 'wlʋ wlu "kpei.
16 ‑Ɩn ‑bi" e 'de 'ɩn o, ‑ɩn nʋ 'ʋn 'saaʋn "jrii,
‑ɩn ‑nyɩ" 'ʋn 'kpɩ, 'mɔ ‑nɩa ‑ma dbonʋɩ ɛ. Kɩɩn,
‑ɩn ji ‑ɩn ‑je ‑ma dbonʋnynɔkpao' 'a "ju 'pʋʋ‑.
17 ‑Ɩn ‑to "jriɛ o sie dɛ 'de 'ʋn ‑pee,
‑wɛe 'ma tʋnyʋ 'jeɛ "jriɛ 'jee 'de tai' 'je ʋʋpʋ‑ "maa‑.
Dɛ ‑nʋɛ Tʋ "bo, ‑mɔ ‑nɩ 'ma kwawɛi ‑te' i,
'Ma ‑tɩ' ‑kwlɩ' i ‑tu" i.